DAHİ NİZAMİNİN YUBİLEYİNƏ HƏSR EDİLƏN ONLAYN TƏDBİR KEÇİRİLİB

Bakı Şəhər Mədəniyyət Baş İdarəsi Binəqədi rayon Mərkəzləşdirilmiş Kitabxana Sistemi tərəfindən bədii fikir salnaməsinin nadir şəxsiyyətlərindən olan dahi Nizami Gəncəvinin 880 illik yubileyi çərçivəsində görüş təşkil edilib.
Onlayn tədbirin qonağı "Nizaminin türklüyü və türklüyə münasibəti Azərbaycan nizamişünaslığında" kitabının müəllifi, AMEA Məhəmməd Füzuli adına Əlyazmalar İnstitutunun elmi katibi, filologiya üzrə fəlsəfə doktoru, dosent Əzizağa Nəcəfov olub.
Apardığı tədqiqatla bağlı çıxış edən alim həm XIX-XX əsrlərdə, həm də müasir dövrdə Nizamişünas alimlərimizin araşdırmalarında əks olunan dahi şairin milli mənsubiyyət etibarilə türk olması haqqında elmi dəlilləri nəzərə çatdırıb. Müəllifi olduğu kitabda Azərbaycan nizamişünaslığının xronoloji ardıcıllıqla təqdim edildiyini vurğulayan Əzizağa Nəcəfov şairin öz soy-kökünə dərin rəğbətinin ifadə olunduğu əsərlərindən söz açıb. Bildirib ki, Nizami öz fəlsəfi fikirlərini cəmiyyətə çatdırmaq məqsədilə o dövrün tələblərinə uyğun olaraq əsərlərini farsca yazıb. Bununla belə, Azərbaycan söz sənətinin sultanı həm dil, həm də üslub baxımından fars şairlərindən fərqlənib. Yaradıcılığını incələdikdə isə onun türklüyü ilə bağlı dəlilləri və gizli şəkildə bəyan etdiyi fikirləri çözmək mümkündür. Alim vurğulayıb ki, tarixi mənbələrin bir çoxunda Nizaminin Gəncədə dünyaya gəlməsi haqda qeydlər mövcuddur. Hələ o dövrün alimləri Azərbaycanla bağlı tədqiqatlarında Gəncənin adını çəkərkən Nizaminin adını türk hökmdarlarına əsərlər ithaf etməsi ilə birlikdə vurğulayıblar.
Qeyd edək ki, 2019-cu ildə ərsəyə gələn və bir sıra ölkələrdə təqdimatı keçirilən "Nizaminin türklüyü və türklüyə münasibəti Azərbaycan nizamişünaslığında" kitabının baş elmi məsləhətçisi və “Ön söz”ün müəllifi AMEA-nın müxbir üzvü Nüşabə Araslıdır. Monoqrafiyanın elmi redaktoru filologiya üzrə fəlsəfə doktoru, dosent Əkrəm Bağırov, rəyçiləri filologiya elmləri doktoru, professor Xəlil Yusifli və filologiya üzrə fəlsəfə doktoru, dosent İbrahim Quliyevdir.
Nizamişünaslar üçün dəyərli mənbə olan monoqrafiyada əks olunan mövzuya dair mühazirə böyük maraqla qarşılanıb. Kitabın Nizami Gəncəvinin türklüyünü şübhə altına alan, onun milliyyətcə fars olması ilə bağlı təbliğat aparan əcnəbi alimlərə tutarlı cavab olduğu vurğulanıb.
Həmin mühazirəni buradan izləmək mümkündür.