ALMANİYADA NƏŞR OLUNMUŞ KİTABA ƏLYAZMALAR İNSTİTUTU HAQQINDA MƏLUMAT DAXİL EDİLİB

Bu günlərdə Almaniyanın paytaxtı Berlində tədqiqatçı jurnalistlər Filin von Ofeln, Frank Şüttiq və Holqar Kretşmarın “Aserbaidschan: Mit Baku, Kaukasus und Kaspischem Meer” (Azərbaycan: Bakı, Qafqaz və Xəzər dənizi ilə) adlı kitabı “Trescher Verlag” nəşriyyatında işıq üzü görüb. Kitaba Azərbaycan tarixi, mədəniyyəti və coğrafiyası haqqında məlumatlar daxil edilib.
Müəlliflər qədim və müasir Bakını alman oxucusuna daha yaxından tanıtmaq məqsədilə şəhərin bir çox tarixi abidələri, tanınmış binaları, muzey və elmi-tədqiqat müəssisələri, o cümlədən AMEA Məhəmməd Füzuli adına Əlyazmalar İnstitutu barədə ətraflı məlumat toplayaraq kitaba əlavə ediblər.