NİZAMİ AZƏRBAYCANIN MİLLİ TƏFƏKKÜRÜNÜN PASPORTUDUR

Azərbaycan mədəniyyəti, mifologiyası, folkloru, təfəkkürü, fəlsəfəsi Nizami yaradıcılığında sanki özünə qədərki mərhələni tamamlamış şəkildə ifadə olunur. Yəni Nizami bir növ, Azərbaycanın milli təfəkkürünün pasportudur.
Nizami əsərləri ilə dünyaya səs salmış sənətkardır, onun ədəbi məktəbi Hindistandan Şərqi Avropaya qədər böyük coğrafi ərazini əhatə edir. Hazırda dünyada mövcud olan kitabxanaların, ayrı-ayrı muzeylərin, şəxsi kolleksiyaların xəzinələrinə nəzər yetirdikdə orada Nizaminin əlyazmalarını görürük.
Bu fikri AMEA Məhəmməd Füzuli adına Əlyazmalar İnstitutunun elmi katibi, filologiya üzrə fəlsəfə doktoru, dosent Əzizağa Nəcəfzadə İctimai Televiziyanın “Sabahın xeyir, Azərbaycan”proqramında qonaq olarkən səsləndirib.
Dahi şairin əsərlərindən söz açan alim Nizami Gəncəvinin Məhəmməd Füzuli adına Əlyazmalar İnstitutunda qorunub saxlanılan əlyazmaları haqqında maraqlı məlumatları nəzərə çatdırıb. Cari ildə institutun direktoru, akademik Teymur Kərimlinin rəhbərliyi ilə həyata keçiriləcək layihələrdən, tədqiq olunacaq əsərlərdən söz açıb.
Həmin müsahibəni buradan izləmək mümkündür.