ƏLYAZMALAR İNSTİTUTU İLƏ ÖZBƏK-ÇİN İNSTİTUTU ARASINDA QARŞILIQLI ANLAŞMA VƏ ƏMƏKDAŞLIQ MEMORANDUMU İMZALANIB » Əlyazmalar İnstitutu
(+994) 12 4923197 AMEA M.Füzuli ad. Əlyazmalar İnstitutunun rəsmi saytı
AZ EN



ƏLYAZMALAR İNSTİTUTU İLƏ ÖZBƏK-ÇİN İNSTİTUTU ARASINDA QARŞILIQLI ANLAŞMA VƏ ƏMƏKDAŞLIQ MEMORANDUMU İMZALANIB

09.06.20. Oxunma sayı: 119 BEYNƏLXALQ ƏLAQƏLƏR
9 iyun tarixində AMEA Məhəmməd Füzuli adına Əlyazmalar İnstitutu ilə Daşkənd Dövlət Şərqşünaslıq İnstitutunun nəzdində fəaliyyət göstərən Konfutsi adına Özbək-Çin İnstitutu arasında elmi-mədəni əməkdaşlıq sahəsində qarşılıqlı anlaşma və əməkdaşlıq memorandumu imzalanıb. Memorandumu imzalayan tərəflər Əlyazmalar İnstitutunun direktoru, akademik Teymur Kərimli və Konfutsi adına Özbək-Çin İnstitutunun direktoru, dosent Səadət Nəsirova olublar. Ümumdünya pandemiya səbəbindən tərəflər arasında görüş onlayn şəkildə baş tutub. Əvvəlcə akademik T.Kərimli söz alaraq zəngin əlyazma irsinə malik Daşkənd Dövlət Şərqşünaslıq İnstitutu ilə qurulan əməkdaşlıq əlaqələrindən məmnunluq duyduğunu bildirib. Əlyazmalar İnstitutunun nadir xəzinəsindən də bəhs açan akademik bu əməkdaşlığın hər iki tərəf üçün faydalı olacağına inandığını söyləyib. S.Nəsirova da öz növbəsində təmsil etdiyi müəssisənin Əlyazmalar İnstitutu ilə yaxından maraqlandığını və bu istiqamətdə əməkdaşlıqdan razı qaldığını ifadə edib. Görüşdə iştirak edən Əlyazmalar İnstitutunun elmi işlər üzrə direktor müavini, filologiya üzrə elmlər doktoru Paşa Kərimov bildirib ki, eyni kökə malik özbək və Azərbaycan xalqlarının elmi əməkdaşlığı hər bir cəhətdən olduqca əhəmiyyətlidir. P.Kərimov Əlyazmalar İnstitutunda özbək xalqına dair çoxlu sayda əlyazmaların saxlandığını, onların arasında böyük şair, filosof Əlişir Nəvainin əlyazmalarının xüsusilə çoxluq təşkil etiyini vurğulayıb. O, Özbəkistanda da Azərbaycana aid əlyazmaların qorunduğunu qeyd edərək bildirib ki, biz öz ədəbiyyatımızı, tariximizi dərindən öyrənmək üçün bir-birimizlə sıx əməkdaşlıq etməliyik.
Görüşün digər iştirakçısı, Beynəlxalq əlaqələr şöbəsinin müdiri, tarix üzrə fəlsəfə doktoru Nigar Babaxanova bildirib ki, rəhbərlik etdiyi şöbə bu əməkdaşlığa dair sənədlərin hazırlanmasında, görüşlərin təşkilində və digər tədbirlərdə səylə iştirak edib və gələcəkdə də bu istiqamətdə əlindən gələni edəcək.
Daha sonra elmi katib, filologiya üzrə fəlsəfə doktoru, dosent Əzizağa Nəcəfzadə Əlyazmalar İnstitutu ilə Özbək-Çin İnstitutu arasında əlaqələrin qurulmasında, bu memorandumun imzalanmasında göstərdiyi vasitəçiliyə görə hər iki elmi müəssisə adından Özbəkistandakı Heydər Əliyev adına Azərbaycan Mədəniyyət Mərkəzinə və onun direktoru Samir Abbasova təşəkkürünü bildirib.
Sonda tərəflər əməkdaşlıq memorandumunu imzalayıblar. Bu Memorandumun məqsədi tərəflər arasında nadir kitab abidələrinin, o cümlədən qədim əlyazma və əski çap kitablarının tədqiqi və tərcüməsi sahəsində qarşılıqlı əlaqələrin qurulması, inkişaf etdirilməsi və möhkəmləndirilməsi, eləcə də elmi-mədəni təcrübə mübadiləsinin həyata keçirilməsindən ibarətdir.



OXŞAR XƏBƏRLƏR:

07.11.19 TƏBRİZ UNİVERSİTETİNİN PROFESSORU ƏLYAZMALAR İNSTİTUTUNDA OLUB
21.02.19 ƏLYAZMALAR İNSTİTUTU İLƏ BEYNƏLXALQ TÜRK-QAZAX UNİVERSİTETİ ƏMƏKDAŞLIQ EDƏCƏK
20.02.19 YUNİS İMRƏ İNSTİTUTUNUN DİREKTORU ƏLYAZMALAR İNSTİTUTUNDA OLUB
28.10.18 AZƏRBAYCAN ALİMLƏRİ TÜRKİYƏNİN SÜLEYMANİYYƏ YAZMA ƏSƏRLƏR KİTABXANASI İLƏ YENİ ƏMƏKDAŞLIĞA İMZA ATMIŞLAR
09.12.17 AMEA-NIN MƏHƏMMƏD FÜZULİ ADINA ƏLYAZMALAR İNSTİTUTU İLƏ DAŞKƏND DÖVLƏT ÖZBƏK DİLİ VƏ ƏDƏBİYYATI UNİVERSİTETİ ARASINDA ƏMƏKDAŞLIQ MEMORANDUMU İMZALANIB

© Copyright 2009-, AMEA Məhəmməd Füzuli ad. Əlyazmalar İnstitutu. Bütün hüquqlar qorunur.
Bağla