ƏLYAZMALAR İNSTİTUTUNUN ELMİ ŞURASININ ONLAYN İCLASI KEÇİRİLİB » Əlyazmalar İnstitutu
(+994) 12 4923197 AMEA M.Füzuli ad. Əlyazmalar İnstitutunun rəsmi saytı
AZ EN



ƏLYAZMALAR İNSTİTUTUNUN ELMİ ŞURASININ ONLAYN İCLASI KEÇİRİLİB

26.04.20. Oxunma sayı: 240 TƏDBİRLƏR
Azərbaycanda COVID-19 pandemiyasının geniş yayılmasının qarşısının alınması məqsədilə tətbiq olunan karantin rejiminə uyğun olaraq AMEA-nın Məhəmməd Füzuli adına Əlyazmalar İnstitutu da öz fəaliyyətini onlayn rejimdə davam etdirir. Müəssisə əməkdaşları elmi-tədqiqat işlərini məsafədən aparır, sosial izolyasiya tələblərinə riayət etməklə monoqrafiya, məqalələr üzərində çalışır, transliterasiya və tərcümə işlərini həyata keçirirlər.
25 aprel 2019-cu il tarixində Əlyazmalar İnstitutunun direktoru, akademik Teymur Kərimlinin sədrliyi ilə İnstitutun Elmi Şurasının növbəti iclası onlayn rejimdə keçirilib.
İclası açan İnstitutun direktoru, akademik Teymur Kərimli gündəlikdə olan məsələlər barədə məlumat verib. Sonra Əlyazmalar İnstitutunun elmi-tədqiqat şöbələrinin başa çatmaqda olan növbədənkənar məzuniyyət dövründə məhsuldar fəaliyyəti müzakirə edilib
Söz alan İnstitutun elmi katibi, filologiya üzrə fəlsəfə doktoru, dosent Əzizağa Nəcəfov bu müddətdə İnstitut şöbələrinin iki onlayn iclas keçirdiyini, hər on gündən bir şöbə müdirlərinin görülən işlərə dair hesabat hazırladığını, hesabatların qısa icmalının ölkə mediasında yayımlandığını nəzərə çatdırıb. Bildirilib ki, məzuniyyət dövründə müxtəlif şöbə əməkdaşları tərəfindən 7 kitab nəşrə hazırlanıb, 4 kitab isə çap olunub; 2 elmi işçi ölkə xaricində, 1 baş elmi işçi isə ölkədə onlayn keçirilən Beynəlxalq konfransa qatılıb, 23 elmi məqalə hazırlanaraq müxtəlif elmi jurnallara təqdim olunub. Məruzəçi şöbələrdə fond materiallarının PDF versiyaları əsasında əlyazma abidələrinin transliterasiya, tərcüməsi işlərinin də plana uyğun aparıldığını, biblioqrafiyalaşdırma və təsvir fəaliyyətinin lazım olan həcmdə həyata keçirildiyini bildirib.
İclasda İnstitutun elmi işlər üzrə direktor müavini, filologiya üzrə elmlər doktoru Paşa Kərimov, Ərəbdilli əlyazmaları tədqiqi şöbəsinin müdiri, filologiya üzrə elmlər doktoru, professor Kamandar Şərifov, Əlyazmaların və əski çap kitablarının tərcüməsi şöbəsinin aparıcı elmi işçisi, filologiya üzrə fəlsəfə doktoru, dosent Əkrəm Bağırov, Təhsil şöbəsinin müdiri, filologiya üzrə fəlsəfə doktoru Kərimulla Məmmədzadə və b.-ları çıxış edərək şöbələrdə icra olunan işlər barədə məlumat veriblər.
İclasda Əlyazmalar İnstitutunun 70 illiyi və Könüllülər ili çərçivəsində əməkdaşların yerinə yetirdiyi elmi-nəzəri və elmi-təşkilati işlər də geniş müzakirə olunub. Bununla yanaşı, İnstitutun doktorant və dissertantlarına məsafədən elmi məsləhət və tövsiyələrin verildiyi, təhsil prosesinin onlayn sistemdə təşkil olunduğu diqqətə çatdırılıb.
Direktor, akademik Teymur Kərimli sosial təcrid dövründə elektron elmi fəaliyyətin bir qədər də təkmilləşdirilməsi ilə bağlı şöbə müdirlərinə tapşırıqlar verib, İnstitutun elmi jurnallarının müntəzəm nəşr olunmasının vacibliyini vurğulayıb.
Onlayn iclası yekunlaşdıran akademik Teymur Kərimli şöbə hesabatları ilə tanış olduğunu, onları qənaətbəxş hesab etdiyini bildirib, İnstitut əməkdaşlarına məsafədən tədqiqat prosesində effektiv iştirak etdiklərinə görə təşəkkür edib.
OXŞAR XƏBƏRLƏR:

23.01.20 AMEA RƏYASƏT HEYƏTİNİN İCLASI KEÇİRİLİB
22.11.19 HUMANİTAR ELMLƏR BÖLMƏSİNİN ÜMUMİ YIĞINCAĞI KEÇİRİLİB
24.06.19 ƏLYAZMALAR İNSTİTUTUNDA “İMADƏDDİN NƏSİMİ: SƏLƏFLƏR VƏ XƏLƏFLƏR – ORTA ƏSRLƏR ƏLYAZMALARI VƏ AZƏRBAYCAN MƏDƏNİYYƏTİNİN TARİXİ PROBLEMLƏRİ” MÖVZUSUNDA XVII RESPUBLİKA ELMİ KONFRANSI KEÇİRİLİB
10.10.18 ƏLYAZMALAR İNSTİTUTUNDA BEYNƏLXALQ QIZLAR GÜNÜ QEYD OLUNUB
07.05.18 HEYDƏR ƏLİYEV VƏ ƏLYAZMALAR İNSTİTUTU

© Copyright 2009-, AMEA Məhəmməd Füzuli ad. Əlyazmalar İnstitutu. Bütün hüquqlar qorunur.
Bağla